GMH/ÍNDICE A-Z

Referencias da busca neste documento para: Documentos da catedral de Lugo. Século XIV

583
1351, outubro, 26. Valladolid
Pedro I confírmalle a don Pedro López, bispo de Lugo, todos os privilexios, exencións e mercés dos que gozaba a súa catedral nos reinados anteriores.

LUGO, AC, CAÑIZARES: p. 1002, atado 3º, n.º 34, perg. orix., 265x265 mm; extr. Tumbo Nuevo, fol. 237v.

MADRID, AHN, Cód. 416 B, fol. 111r, traslado polos notarios Fernando García e Gonzalo Pérez: 1362-II-15.

SÁNCHEZ BELDA: Documentos..., n.º 1132, p. 477.

Sepam quantos esta carta virem, commo yo don Pedro por la gracia de Dios rey de Castiella, de Leon, de Toledo, de Galisia, de Sevilla, de Cuerdova, de Murçia, de Jahen, del Algarbe, de Algesira et sennor de Molina, por faser bien et merçed a dom frey Pedro Lopes obispo de Lugo mi confesor, et al dean et cabildo de la su iglesia por mucho serviçio qu’el dicho obispo me fiso et fase de cada dia, outorgolles et confirmolles todos los privilegios et cartas et franquesas et liberdades et merçedes et graças et donaçiones et sentenças et bonos husos et bonas costumbres que an, et de que husaron sienpre en tempo de los reys onde yo vengo. Et mando que les valla et lles sean guardados et mantenidos en todo bien et complidamente segunt que en ellos se contiene et segunt que les fueron guardados et mantenidos et delos husaron en tiempo de los reys onde yo vengo, et en el mio fasta hoy. Et defendo firmemente que ninguno non sea osado deles yr nin de les passar contra ellos en ninguna manera nin contra esta merçet que les yo fago, et qualquier o qualesquier que lo fisiessen et contra ello les fuessen et passassen en alguna manera, pecharme han en penna mill moravedis desta moneda que se husa et al dicho obispo et dean et cabildo o a quien su vos toviesse todo el dampno et el menoscabo que por ende rescibiessen doblado. Et sobresto mando a qualquier merino que por min andudiere en tierra de Gallisia agora et d’aqui adelante et a todos los concejos et alcalles jurados, jueces, justicias, merinos, algasiles, maestres, priores, comendadores et socomendadores, alcaydes de los castiellos e casas fuertes, et a todos otros oficiales et aportelados de todas las cibdades et lugares de mios regnos que agora son et seran d’aqui adelante o a qualquier o a qualesquier dellos a quien esta mi carta fuese mostrada o el traslado della signado de escribano publico, que amparen et deffendan a los dichos obispo et dean et cabildo con esta merçet que les yo fago et que non consintan a alguno nin algunos que les vayan nin les passen contra ello en ninguna manera so la penna que en los dichos privilegios et cartas que ellos tienen se contiene. Et demas a ellos et a lo que ovissen me tornaria por ello. Et desto les mande dar esta carta seelada con mio seello de plomo.

Dada en las cortes de Valladolid, beynte et seys dias de outubre, era de mill et tresientos et ochenta et nove annos.

Yo Johan Gs. la fis escrivir por mandado del rey.