GMH/ÍNDICE A-Z

369
1338, setembro, 15. León
O bispo de Reus, a través do seu procurador, o racioneiro Martiño González, recibiu do Cabido de Lugo 1900 marabedís curtos polos 60 floríns de ouro que o devandito bispo mandou para o seu proceso.
MADRID, AHN, Carp. 1332 E/6, perg. orix., gótica cursiva, 300x199 mm.

Era de mill et tresientos et setenta et seys annos, quinse dias de setembro.

Sepan quantos esta carta vieren commo yo Martin Gonçales, raçionero en la iglesia [de Lugo], procurador et menssagero del onrrado padre et sennor don Bernaldo, por la gracia de Dios obispo de Reus, menssagero et legado de nuestro sennor el Papa a [...] entre los nobles reys de Castiella et de Portogal, otorgo et conosco que Martin Gonçalves, mio criado et mio procurador, reçibio por mi et en mio nombre, a quatro dias del mes de setembrio en la era de la data desta carta, de vos los onrrados sennores dean et cabildo de la yglesia de Lugo, mill et novesientos maravedis cortos por los sessenta florines de oro que el dicho sennor obispo nos enbio mandar por su proçesso que diessedes a mi o a mi mandado, cuntando por cada florin treynta maravedis, de los quales florines el dicho sennor obispo tasso al obispado de Lugo los çinquaenta florines para su despensa de un anno, et elos dies florines por las costas que yo, Martin Gonçalves, fis ela otra vegada que fuy alla a Lugo en yda et en morada et en venida et con gentes que conmigo ovieron a venir. Et los quales maravedis me el dicho Martin Gonçales, mio criado, dio de que me otorgo por bien pagado. Et porque esto sea firme diemos ende esta carta seellada con mio seello et en que escrivi mio nonbre con mia mano. Et por mayor firmedumbre rogue a Iohan Peres, escrivano, teniente las veses por Alffonso Garçia, escrivano del rey et so notario publico en la eglesia de Leon, que la signasse de so signo.

Fecha en Leon anno et mes et dia sobredichos.

Testimonios que fueron presentes: Pedro abbat [...] et Domingo Iohanes, clerigos de Aguilar de Canpos; Gonçalo Peres et Domingo Peres, palmero, et Fernant Peres, clerigos de Cuenca, çerca Villalon, et otros.

Et yo Iohan Peres, escrivan, teniente las veses por Alffonso Garçia, notario sobredicho, fue presente a esto de suso dicho, et a ruego del sobredicho Martin Gonçales, raçionero, fis escrivir esta carta et fis en ella este signo semellante al del dicho Alffonso Garçia que es tal en testimonio de verdat. (+).