GMH/ÍNDICE A-Z

636
1361, maio, 8. Deza

Real provisión de Pedro I na que se lle ordena a Gómez Fernández de Soria, alcalde e meiriño maior en Galicia, ante a reclamación presentada contra el polo bispo de Lugo, que non entre a exercer a súa xurisdición nos coutos da catedral, por ter privilexios de exención.

MADRID, AHN, Cód. 417 B, fol. 106r.

LUGO, AC, extr., Tumbo Nuevo, fol. 236v.

SÁNCHEZ BELDA: Documentos..., n.º 1157, p. 486.

Don Pedro por la gracia de Dios rey de Castiella, de Tolledo, de Leon, de Gallisa, de Sevilla, de Cordova, de Murçia, de Iahen, del Algarbe, de Algesira, et sennor de Viscaia et de Molina a vos Gomes Ferrnandes de Soria mio alcalde et meryno mayor en Gallisia, et al meryno o merynos que por mi o por vos andudieren agora et d’aqui adelantre en las meryndades de Gallisia, et a qualquer delas o a qualquer o qualesquer de vos que esta mi carta fuere mostrada o el traslado della signado de escripvano publico, sacado con autoridades de iuys o de alcalde, salut et gracia. Sepades que don frey Pedro obispo de Lugo se me querelo et dise que el et su iglesia an privillegios de los reys onde yo vengo et confirmados de mi et huso et costumbre de gran tiempo ata aqui que nihun adelantado nin meryno non entren en los sus cotos et çelieyros a faser iusticia, salvo quando el dicho obispo o aqueles que y andudieren por el la non quisieren faser, et que agora vos et los merynos que andan por vos que entrades en los sus cotos et çelleyros a faser iustiça et los llamades et emprasades que vayan convosco, et fasedes otros dampnos et males sin rason et sin derecho por los cohechar con poder de los ofiçios que avedes, et les ydes et entrades contra los dichos privillegios, et que llos non queredes guardar, et que commo quier que vos sobre esto mostro et fiso mostrar una mi carta que le yo mande dar en esta rason que lla non quesiestes guardar nin complir, et en esto que ha rçebido el et su iglesia agravio et perdido et menoscabado mucho de lo suyo, et pidiome merçed que mandase yo lo que toviese por bien. Por que vos mando vista esta nuestra carta a vos et a los merynos que andudieren por vos en las dichas meryndades et a los otros merynos que y andudieren despues de vos, que veades la dicha carta que vos el dicho obispo o el que lo ovier de aver por el vos mostrar, et la guardedes et complades et fagades guardar et cumplir en todo segundo que se en ela contiene, et los unos nin los otros non fagades ende al por ninguna manera su pena de la mi merçed et de seysçentos moravedis desta moneda usual a cada uno, et si non por qualquer et qualesquer de vos que fincar de lo assy cumplir mando al dicho obispo o al que lo ouver de ver et recabdar por el, que vos enprasare a quinse dias primeyros seguentes so la dicha pena a cada uno. Et de commo vos esta mi carta fuer mostrada et la complides mando so la dicha pena a qualquer escripvano publico que para esto fuere llamado que de ende al que vos la mostrar testemoyo signado con su signo, et por que yo sepa en commo complides mio mandado.

La carta leyda datgela.

Dada en el rayal de Deça, ocho dias de mayo, era de mill et tresentos et noventa et nove annos.

Fernan Lopes teniente lugar de notario del regno de Leon la mando dar.

Yo Nicolas Beltran escrivano del rey la fis escrivir.

Fernan Lopes.