GMH/ÍNDICE A-Z

597
1353, xuño, 11 martes. Valladolid
Carta de poder outorgada por Gonzalo e Sancho Sánchez a favor do seu irmán Lope Sánchez.
MADRID, AHN, Cód. 417 B, fol. 46r, incluída en: 1354-III-31, (CD n.º 602).

Sepan quantos esta carta de poder viren commo yo Gonçalvo Sanches et yo Sancho Sanches, fijos de Sancho Ferrnandes de Riba de Neyra, freyres que somos della orden de cavalleria, outorgamos et conosçemos que damos todo nuestro poder comprido a Lope Sanches, nuestro yrmano, para que el por nos et en nuestro nombre poda aver et demandar et cobrar todos los benes que nos heredamos et avemos de aver por parte de nuestro padre et de nuestra madre en qualquer lugar que los nos ayamos et devamos aver, et para que los pueda vender o enpennar et arrendar o enagenar todos o parte delos por la quantia o quantias que el quisiere y por bien toviere, et para que pueda mandar façer carta o cartas a qualquier o qualesquier scripvano o scripvanos publicos sobre la dicha raçon, et para que pueda faser et diser et rasonar todas aquelas cossas et cada qual delas que nos mismos fariamos o diriamos o rasonariamos si presentes fuessemos, et quant grant poder comprido nos avemos et nos dio nuestro sennor, el mestre de la orden de Calatrava, tant grant poder comprido damos nos al dicho Lope Sanches, nuestro yrmano, para que pueda façer et diser et rasonar todas aquelas cosas et cada qual delas que nos miismos fariamos o diriamos o rasonariamos si presentes fuessemos, et quant grant poder comprido nos avemos et nos dito nuestro sennor, el mestre de la orden de Calatrava, tant grant poder comprido damos nos al dicho Lope Sanches, nuestro yrmano, para que pueda façer et diser et rasonar todas aquellas cosas et cada qual dellas que nos miismos fariamos et diriamos et rasonariamos si presentes fuesemos aunque sean d’aquelas cosas que requiren special mandado, et prometemos et outorgamos de aver por firme et de estar por todo lo que el dicho Lope Sanches por nos et en nuestro nombre fesiere, sub obligaçon de todos nuestros benes. Et por que esto sea firme et non venga en dulta mandamos façer esta carta de poder a Martin Rodrigues, scripvano publico de Valladolid, et rogamos a los testigos que aqui scriptos que lo firmen.

Desto son testigos que foron presentes rogados para esto firmar: Garçia Ferrnandes, fijo de Vicente Martines; et Martin Ferrnandes, fijo de Iohan Ferrnandes; et Martin Ferrnandes, fijo de Garçia Peres, criados de Ynes Garçia, todos vesinos de Valladolid.

Fecha esta carta en Valladolid martes onse dias de junio, era de mill et tresentos et noventa et hun annos.

Yo Martin Rodrigues, scripvano publico de Valladolid por nuestra sennoria la reyna, foy a esto presente et por mandado de los dichos Sancho Saches et Gonçalvo Sanches, su yrmano, fis esta carta deste poder et fis aqui meu signo.