GMH/ÍNDICE A-Z

144
1314, xullo, 8

Concordia entre os arcebispos de Santiago, Toledo e diversos bispos, entre eles o de Lugo, sobre liberdade e disciplina eclesiástica.

Tomado de CAÑIZARES, pp. 958-962, orixinal conservado en LUGO, AC, atado 3º, est. 21, 740x330 mm. No reverso do perg. atado 1º, n.º 22.

Noverint universi presentes literas inspecturi quod nos miseratione divina, Rodericus Compostellanus, Guterrius toletanus, Fernandus ispalensis archiepiscopi, Gundissalvus burgensis, Petrus salamantinus, Alfonsus cauriensis, Dominicus placentinus, Rodericus mindoniensis, Alfonsus civitatensis, frater Johannes lucensis, frater Simon pacensis, Sancius abulensis, Joannes tudensis, eadem miseratione episcopi. Ordinamus inter nos quod si aliquis nostrum sententias excomunionis seu suspensionis in aliquem tulerit cuiuscumque conditionis status et dignitatis existat seu interdicti sententiam promulgaverit in futuram vel locum ad iurisdictionem alicuius quocumque iure pertinentem propter aliquod crimen vel trasngressionem aut spoliationem aut maleficium comissum in rebus suis aut ecclesia vel vasallorum suorum vel ecclesie sue vel propter infractionem privilegiorum libertatum et aliorum iurium ecclesiasticorum prelati super hoc requisiti teneantur illas sententias observare et in suis ecclesiis cathedralibus el aliis ecclesiis et monasteriis suarum civitatum et diocesium iuxta requisitionem sententias proferentis diebus dominicis et festicis facere publicari et excomunicatos seu interdictos vitare et facere per suos subditos evitari.

Item quod in arduis causis nostris et ecclessiarum nostrarum quas habemus vel a modo contingerit nos habere contra quascumque personas teneamur ad invicem nos iuvare prestando consilium et favorem et hoc tam in curia domini regis quam alibi.


Item quod unusquisque nostrum in satisfactionibus seu emendis recipiendis pro excessibus gravinibus et iniuriis nobis et ecclesiis nostris et personis ecclesiasticis vel alicui nostrum hactenus illatis vel modo inferendis teneatur sequi consilium duorum prelatorum qui vicinioris fuerint eidem si ipsos requiverit quod si eorum consilium sequi voluerit alii prelati huiusmodi ex tunc in illo negotio eius sententias observare ac publicare minime teneantur nec ei quo ad hoc prestare consilium vel favorem.

Item si rex, vel tutores ipsius aut regni gubernatores aliquas exactiones fecerint seu servitia vel subsidia petierint a prelatis et clericis vel ecclesiis, prelati nullo modo tales exactiones et servitia seu subsidia concedant nisi prius suis capitulis requisitis. Et si capitulis videatur propter aliquas necessitates que occurrere possunt expediens tales exactiones seu servitia vel subsidia peti posse, tunc demum prelati qui sunt et fuerint in ordinatione et unione predicta convocentur ut per se vel per procuratores suos in unum locum conveniant et super hoc respondeant, ordinent et disponant illud quod viderint necessitati regni et suis ecclesiis expedire. Et prelati qui super hoc vocati fuerint per illum qui ad hoc deputatus fuerit venire per se vel per procuratorem ydoneum teneantur.

Item si delinquentes et iniuriam irrogantes ecclesiis prelatis seu aliis personis ecclesiastici non habeant terram sive loca in diocesi ubi talia delicta perpetrarunt, seu iniurias irrogarunt [...] aliis autem diocesibus habere seu possidere dinoscuntur. Tunc prelatus seu prelati in cuius sive [...]orum diocesibus delinquentes vel iniuriantes terram habuerint requisitus vel etiam requisiti[...] prelatum in cuius diocesi delictum extitit perpetratum vel iniuria irrogata iniuriante prius legitime monito per passum iniuriam nomine suo et aliorum prelatorum teneantur requisitione facta ut dictum est terram sive loca ad iurisdictionem delinquentis vel iniuriantis quocumque modo spectantia subicere ecclesiastico interdicto et istud interdictum facere diebus dominicis et festivis in ecclesia cathedrali et aliis ecclesiis civitatis et diocesis iuxta requisitionem proferentis sententiam publicari.

Item si rex vel ipsius tutores seu regni gubernatores petierint a prelatis servitia seu subsidia vassallorum ecclesiarum nullus eorum talia servicia seu subsidia concedat nec a vassallis recipi consentiat nisi prius a prelatis, qui sunt et fuerint in ordinatione predicta tunc in curia regis existentibus et a procuratoribus absentium prelatorum ibidem presentibus consilium requiratur. Et si aliqui vel aliquis ex prelatis talia servitia seu subsidia regi facere vel eius tutoribus non consenserit. Et rex vel eius tutores aliquid faciant vel ordinent contra tales. Omnes prelati teneantur istos defendere et adiubare ne inviti huiusmodi servicia et subsidia facere compellantur prestando consilium et favorem et eum vel eos contra delinquentes vel iniuriantes cum excomunicationis suspensionis et interdicti sententiis adiuvare.

Statuimus etiam quod si aliqui subditi nostri cuiuscumque dignitatis conditionis vel status existant iniuriose contra nos vel nostrum aliquem seu aliquos insurrexerint conspirando vel seditiones colligationes seu coniurationes cum aliis contra nos faciendo vel alias quocumque modo nobis iniuriando quod iuvemos nos ad invicem fideliter tam spiritualiter latas contra eos sententias observari ac publicari faciendo quam temporaliter prout fuerit opportunum cum super hoc requisiti fuerimus per literas illius prelati contra quem predictorum aliquid fuerit atenptatum.

Item si aliquis prelatus qui non est in ordinatione seu unione predicta dicatur iniuriam aliquam irrogasse alicui ex prelatis qui in eadem ordinatione sunt vel fuerint in futurum et de tali prelato passus iniuriam conqueratur. Prelatus qui talem iniuriam fuisse dicitur nullatenus ad hanc unionem et ordinationem recipiatur nisi prius satisfactionem faciat conquerenti.

Item non est intetionis nostre quod contra personas regis et regine nec contra personas infantum domini Johannis et domini Petri, modo aliquo procedatur nec ad eorum personas presens ordinatio extendatur predictorum infantium tutela durante cum eorum terre sive loca possint propter eorum culpam subici ecclesiastico interdicto.

Item hanc ordinationem extendi volumus ad preterita negotia pendentia et futura.

Volumus etiam et ordinamus quod si aliqui alii archiepiscopi vel episcopi de regno nobiscum convenire voluerint in ordinationibus et statutis inter nos ordinatis et ordinandis quilibet nostrum habeat potestatem recipiendi eos ad unionem et fraternitatem inter nos contractam dum modo prestiterint iuramentum ad observantiam eorundem apponendo etiam sigilla sua alicui litterarum [...]as inter nos confecimus et nomina cum subscriptionibus et confirmatione eidem littera subscribendo.

Item omnes et singuli concedimus cuilibet nostrum auctoritate harum literarum plenariam potestatem praestandi illi a quo receperit iuramentum in animas nostras et cuiuslibet nostrum consi[..]le iuramentum et dandi sibi nomine suo et nostro litteras sigillo suo sigillatas et manu propria subscriptas et confirmatas in quibus contineantur ordinationes et obligationes predicte et unio et fraternitas suam cum eo nomine suo et nostro contraxerit ad quorum observationem omnes volumus obligari. Et nos omnes et singuli iuramus nobis ad invicem nomine nostro et succesorum nostrorum per sancta Dei evangelia coram nobis presentata omnia et singula supradicta firmiter observare etiam si ad alium statum vel locum nostrum aliquis in Ispania transferatur. Ita tamen quod si omnibus nobis in simul qui in regno fuerimus vocati venire vel inittere voluerimus visum fuerit expedire possimus mutare vel minuere aliqua [...] predictis seu addere in eisdem et nobis ad invicem pro parte vel toto remittere iuramentum.

Datum apud Valemoleti octavo idus iulii, anno domini millessimo CCC quarto decimo.

Rodericus, compostellanus archiepiscopus cf.; Guterrius, archiepiscopus toletanus cf.; Gundisalvus, episcopus burgensis cf.; Sancius, episcopus abulensis cf.; Petrus, episcopus salamantinus cf.; Dominicus, episcopus placentinus cf.; frater Joannes, episcopus lucensis cf.; Alphonsus, auriensis episcopus cf.; Alphonsus, episcopus civitatensisn cf.; Johannes, tudensis episcopus cf.; frater Simon, pacenus episcopus cf.