GMH/ÍNDICE A-Z

130

1404, setembro, 22.
Carta de García Sánchez del Castillo, alcalde maior do Reino de Galicia, que, a pedimento do Cabido e clero da Catedral de Mondoñedo, mándalles, de parte do rei, ós cabaleiros, escudeiros e ricos homes que non se excedan esixindo tributos nas terras das administracións da devandita Catedral.
A, papel, que conserva restos do selo de cera vermella no reverso, de 250 x 275 mm. Letra semigótica.

Yo Garçia Sanches del Castillo alcalde de nuestro sennor el rei en la su corte et su alcalde mayor en el regno de Galisia fa/go saber a uos el obispo de Mondonedo et a todos los caualleros et escuderos et onbres poderosos et otras personas qualesquier del / dicho regno de Galisia et a qualquier et a qualesquier de vos que el dean et cabildo et arçediagonos et canonigos et racioneros et / clerigos et seruidores de la dicha iglesia de Mondonedo se me querellaron et disen que vos los sobredichos o algunos de vos / non deuidamente syn rason et syn derecho que les echades e faredes echar algunos pechos et pedidos et seruentias et / çeuadas et yantares et otros trebutos algunos a ellos et a los sus caseros et seruiçiales et en las sus terras et aministra/çiones que son de la dicha iglesia de Mondonedo que dis que non son tenudos nin lo deuen pagar segund derecho et los / priuilegios que sobre elo tienen en lo qual dis que se asi obiese de pasar que reçebirian moy grande agrauio et / danno et pedironme que lea probiese en ello de remedio con derecho mandandoles dar carta de seguro para bos en la dicha / rason. Por ende yo de parte del dicho sennor rei tomo et reçebo en garda et seguro et anparamiento et de defende/miento a los dichos dean et cabildo et arçidiagonos et canonigos et raçioneros et clerigos et seuidores de la dicha iglesia / et a los sus labradores et caseros et seruiçiales et a todas sus menistraçiones et a cada vno dellos et a sus bienes / et los aseguro de vos los sobredichos et de cada vno de vos et de los que por vos han de faser et mando / et defiendo de parte de dicho sennor rei que agora nin de aqui adelante que les non tomedes cosa alguna de lo suyo / nin les echedes nin les demandedes las dichas seruintias et yantares et çeuadas nin pechos nin biandas pues / dis que non son tenidos a bolo dar nin pagar nin les echedes nin demandedes los dichos pechos et pedidos / et tallas nin otro trebuto alguno saluo aquello que fuer merçed del rei de les mandar pagar et se seruir dellos segundo / que de los otros de sus regno cada que la su merçed fuer de gello mandar pechar o pagar segund en los dichos sus / priuilegios se contiene nin les fagades otro mal nin danno nin desaguisado alguno so pena de la merçed del dicho sennor rei / et de diez mill mor. a cada vno para la su camara et de mas por qualquier o qualesquier que lo contrario fesierdes et que/brantardes el dicho seguro que seades tenudos a aquellas penas que los derechos ponen contra aquellos que quebrantan / tregoa et seguro puesto de parte de su rei et su sennor natural Et por que de estos seades çiertos et non podades ale/gar ignorançia que non vyno a vuestras notiçias mando que los alcaldes et alguasiles et otros ofiçiales qualesquier de la / dicha çibdad de Villamayor et de su obispado que lo fagan asi pregonar publicamente con pregonero et por ante / scriuano publico et el dicho pregon fecho se vos los sobredichos o algunos de vos les fuerdes o pasardes contra el / et gello quebrantardes que pasen et proçedan contra vos et contra cada vno de vos segund que por fuero et por derecho fa/llaren en tal caso sobre dicha pena et desto mande dar esta mi carta firmada de mi nonbre et sellada de / mi sello. Fecha en veynte et dos dias de setenbro anno del nasçemiento de nuestro sennor Jesucristo de mil et quatroçientos / et quatro annos. Yo Juan Gomes de Agostin escriuano del rey la fis escriuir por mandado del di cho alcalde (Atópanse dúas rúbricas sen nome ningún).

(Reverso):
O. lx. M.vii. n. 125. Carta do seguro do alcalde del rey.