GMH/ÍNDICE A-Z

299
1334. Lugo
Os cóengos Arias de Parga e Velasco Díaz solicitan do Cabido licenza para estudar en Salamanca.
 MADRID, AHN, Cód. 1042 B, fol. 74v.

Era Mª CCCª septuagesima secunda [...] Fernandi, publici notarii lucensis, congregato capitulo ecclesie lucensis in choro [...] Aras de Parrega ac Velascus Didaci, canonici predicte lucensis ecclesie, dixerunt quod ipsi proponebat ire ad studium Salamanticum, et petierunt licenciam a dicto capitulo pro duobus annis et quod concederent eis fructus porcionum suarum, quas habebant in dicta lucensis ecclesia pro tempore supradicto, quo proponebant in dicto studio remanere. Et tunc donnus Petrus Roderici, archidiaconus de Deçon et vicarius generalis reverendi patris donni Iohanni, Dei gratia lucensis episcopi, ac dictum capitulum, responderunt quod cum essent XXIIIIor persone et canonici numero solum in dicta lucensis ecclesia erant ad presens XII eorum absentes ab ecclesia et tamen porciones suas vel in studiis vel ex privilegiis in absencia percipiebant tamen quod recipiebant easdem porciones dicti absentes seu fructus dictarum porcionum, secundum constituciones dicte ecclesie et secundum consuetudinem in dicta lucensis ecclesia a longis retroactis temporibus observatam. Et licet ipsi qui erant residentes in dicta ecclesia ac eadem ecclesiam fuissent et essent ex hoc quam plurimum agravati. Verum tamen dictorum canonicorum laudabile propositum approbantes cum secundum consuetudine in dicta lucensis ecclesia a tanto tempore observatam cuius contrarium in memoria hominum non existit medietas panis et vini et dinerorum qui vocantur de condoytu cuiuslibet porcionis in dicta lucensis ecclesia pro cotidianis distributionibus teneatur habeatur, et etiam reputetur taliter quod etiam in eadem civitate et ecclesia personis et canonicis et porcionariis cotidie et continue residentibus non datur nisi venerint salutem semel in die ad horas ad corum ecclesie memorate. Idem cum protestacione quod salva integra et inviolata remaneat consuetudo predicta, et quod dicti canonici dictam licenciam petentes dum fuerint in studio nichil percipiant de dictis distributionibus cotidianis prout sunt superius declarare, nec de denariis orarum \medietis/ et quod alie constituciones si qui sunt dicte ecclesie, eidem consuetudii annuentes similer observentur, eisdem canonicis pro dictis duobus annis licenciam conceserunt taliter quod existentes per spacium primorum duorum annorum proximo sequemcium in dicto studio salamantino vel alio studio generali habeant et percipiant alios redditus et fructus dictorum porcionum suarum prout eos alii canonici dicte ecclesie consueverunt percipere tempore bone memorie donni fratris Iohannis, quamdam eiusdem lucensis ecclesie episcopi et predecesorum suorum, et a tanto tempore citra cuius contrarium in memoria hominum non habetur. Et si dicti canonici, vel eorum aliquis, contra hoc venire temptassent super dictis distribucionibus cotidianis superius declaratis, et dineriis orarum, dictum capitulum seu qualibet de capitulo inquietando in iudicio vel extra vel aliqualiter molestando quod dicta licencia pro non concessa penitus haberetur, et dicti canonici supradictis omnibus annuentes et omnia expresse approbantes sub predictis modis et condicionibus dictam licenciam receperunt dictatuerunt etiam tunc dicti vicarius et capitulum quod omnia ista servare teneantur omnis alii persone canonici et porcionarii dicte ecclesie tam presentes sive isto tempore et ipsa ecclesia existentes beneficiati quam etiam futurum qui de cetero recepiti fuerint in dicta ecclesia memorata, et non alteriuscumque seu quibuscumque pro studiis licencia concedatur, quod statutum omnis beneficiati et beneficiandi in dicta ecclesia servare inviolabiliter teneantur ut alias constituciones ecclesie sub penna [prefati] et prestandi iuramenti de constitucionibus et statutis dicte ecclesie observandis. Qui fuerunt presentes in dicto capitulo: dictus vicarius donni episcopi; Fernandus de Deo, cantore; Alvarus Didaci, archidiaconus de Sarria; Gundisalvus Garsie, scolasticus; Arias Pelagii, thesaurarius; Andreas Petri, cantor de Armetia; Alfonsus Gomecii, Petrus Arie, Iohannes Fernandi et Velascus Didaci, canonici lucensis; et Iohanes Fernandi, portionarius; et Iacobus Iohannis, dispensator capituli, testis.

Et ego Rodericus Fernandi, publicus in civitate lucensis auctoritate episcopali notarius iuratus, promissis omnibus et singulis una cum dictis testibus interfui et de mandato dictorum vicarii et capituli in isto libro hoc publicum instrumentum scripsi et in publicam formam reddegi meoque signo consueto signavi in testimonium veritatis. (+).

Addicientes dicti vicarius et capitulum dicto statuto et statuentes pro constitucione sub pena iuramenti in perpetuum observanda et per me dictum notarium, Rodericum Fernandi, scribi et signari in isto libro facientes, quod quando dicta licencia pro studio fuerit aliquibus personis canonicis seu portionariis dicte ecclesie concedenda petentibum eam personaliter per se a capitulo dicte ecclesie et in capitulo, et non aliis absentibus quocumque modo directe vel indirecte concedatur, nec fructus portionis seu aliqua pars ipsorum fructuum pro studio eis seu eorum alicui alter assignetur seu etiam concedatur. Et isti adicioni ego dictus notarius signum meum apposui in testimonium veritatis. (+).