De
mi Iohan Rodrigues de Rosales, merino mayor por el rey en Gallisia en
lugar de Pedro Ferrnandes de Velasco, adelantado mayor por el dicho
señor rey en Gallisia, a todos los merinos das merindades de
Gallisia, que agora son por mi o seran d’aqui adelante, e a
qualquier ou qualesquiera de vos que esta mi carta vieredes o el
traslado della signado de scrivano publico, salud e buenaventura.
Fago-vos a saber que don frey Pedro Lopes, obispo de Lugo, me mostro
privilegios e cartas dos reys que fueron de Castiella e de Leon, e
confirmados de nuestro señor el rey don Pedro que agora es,
que Dios mantenga, en que se conten que manda a todos los adelantados
e merinos del regno de Gallisia que non entren en los cotos e
señorios del dicho obispo e de su yglesia, nin fagan y
justicia, nin emprasen, nin tomen ningua cosa a aquelos que y
moraren, salvo que seyendo el primeramente frontado que faga justiçia
e la el non quisiere faser, que finque a salvo a los sus merinos et
adelantados para la faser. E agora el dicho señor obispo
pidiome e afrontome que lle guardase e cumpliese los dichos
privilegios e cartas e lle non pasase contra ellos, e mandase a vos
que ge los guardasedes e cumpliesedes asi. Porque vos mando, vista
esta mi carta o el traslado della signado segun dicho es, a todos e a
cada unos de vos, que non entredes nin fagades justiçia en los
cotos e señorios del dicho señor obispo de Lugo e de su
yglesia, nin en alguno delos, nin enprasedes, nin tomedes en ningua
manera ningua cosa de lo suyo a los moradores delos, nin pongades en
ellos taias nin outros pechos ninguas, nin consintades a otro ninguno
que gelo faga, mas se querellas algunas ouveredes de los dichos
cotos, o de los moradores delos, enviade frontar al dicho senor
obispo que faga dellas comprimiento de derecho, e el non lo querendo
faser finca a vos a salvo de los faseredes. E non fagades ende al sub
pena de seiscentos morabetinos desta moneda usual e sub aquellas
penas que se enos dichos privilegios e cartas contienen, a cada uno
de vos. E de como vos esta mi carta fuere mostrada o el traslado
della, e la cumprides, mando a qualquier scrivano publico que para
esto fuere llamado, que de ende al que vos la mostre testemonio
signado con su signo. E non faga ende al so la dicha pena.
La carta
leida dadgela.
Fecha
en Lugo, veinte e seis dias de setembre, era de mil e tresentos e
noventa e seis años.
Yo
Pedro Lopes la fis escrivir por mandado del dicho Iohan Rodrigues,
merino.