GMH/ÍNDICE A-Z

1039
1434, abril, 19 luns. Vilafranca

Acta notarial na que o Cabido aprema a Gonzalo Rodríguez para que nomee dous fiadores en razón das propiedades capitulares que este leva no Bierzo.

MADRID, AHN, Carp. 1332 A/1 (bis), perg. orix., galego, cortesá, 400 x 347 mm, inclúe carta de foro: 1434-III-18, (V. CD nº 1037).
   

Ano del nasçemento del nuestro salvador Jhesu Christo de mill et quatroçentos et trinta et quatro anos, dia lunes, dez et nove dias del mes de abril. En presença de min Fernan Rodrigues, notario publico a la merçede de min senor don Lopo de Mendoça, Arçobispo de Santiago en Villafranca çerca Valcarçer, et de los testigos adelante escriptos, estando este dicho dia en esta dicha Villafranca dentro en las casas de morada de Johan Alfonso de Samoes, vezino et morador en esta dicha Villafranca, et estando ende presente Gonçalvo Rodrigues, apresento et fezo leer por min, el dicho notario, una carta de foro escripta en purgameno de coyro et signada de signo de notario publico et seellada de hun seello posto sobre çera verde encayado en çera amariella pendente en una varaça preta, segun que se por la dicha carta paresçia et se en ella contenia, el tenor de la qual es este que se sigue:

segue a continuación o foro do 1434-III-18, (CD nº 1037).

la qual dicha carta assy presentada et leyda logo el dicho Gonçalvo Rodrigues dixo que por quanto en la dicha carta de foro se contenia que el avia a dar fiadores al cabidoo de la iglesia de Lugo para tener en boo paramento las casas et herdades et ortas et vinas et benes contenidos en la dita carta de foro, que el tenia aforados del dean et cabidoo de la dita iglesia de Lugo, segun que se contenia por la dita carta, et para pagar en cada hun ano al dicho cabidoo el foro contenido en la dita carta et comprir et faser las condiçones et foro, que se contenian en la dita carta de foro, et por quanto Rodrigo Alfonso de la Rigeira, canonigo en la dita iglesia de Lugo, que estava presente le demandava en nombre del dean et cabidoo de la dita iglesia de Lugo los dichos fiadores, por ende que el dava et dio por sus fiadores sobre esta dita rason a Gonçalvo Peres, morador en el varreo de la Carniçaria desta dita Villafranca, et a Gomes Ares, genrro de Fernan Yanes de Neyra, vesinos et moradores en esta dicha Villafranca, que estavan ende presentes, et a ambos et dos de mancomun et a cada uno dellos por el todo, a los quales ditos Gonçalvo Peres et Gomes Ares dixo que rogava et rogo que lo fiassen et entrassen por sus fiadores sobre esta dicha rason. Et logo los dichos Gonçalvo Peres et Gomes Ares por rogo del dicho Gonçalvo Rodrigues dixeron que eles anbos et dos de mancomun et cada uno dellos por el todo que obligavan et obligaron assy mesmos et a todos sus benes, mobeles et rayses, avidos et por aver, para que se el dicho Gonçalvo Rodrigues non comprise nin fezesse las condiçoes contenidas en la dicha carta de foro nin pagasse en cada hun ano el dicho foro contenido en la dicha carta, en la manera que se en la dita carta contenia, para compriren et fazeren los dichos Gonçalvo Peres et Gomes Ares las ditas condiçones contenidas en la dita carta de foro, et pagaren el dicho foro en cada hun ano contenido en la dita carta, segun et en la manera que se las dichas condiçiones et el dicho foro contenian en la dicha carta de foro, et dixeron que sobre esta dicha rason se sumetian et sumeteron al foro et jurdiçion eclesiastica de la dicha iglesia de Lugo, segun et en el modo et manera qu’el dicho Gonçalvo Rodrigues se avia sumetido al foro et jurdiçion eclesiastica de la dicha iglesia et segun que en la dicha carta de foro se contenia. Et esto todo en como passo el dicho Gonçalvo Peres et Gomes Ares, sus fiadores, rogaron a min el dicho notario que assy lo escrivisse en publica forma et lo desse assy signado de mio signo al dicho Rodrigo Alfonso de la Regeira, canonigo sobredicho, para garda del derecho de los dichos dean et cabidoo de la dicha iglesia de Lugo.

Testigos que foron presentes: Johan Alfonso de Samoes, et Meendo de Crezul, et Vaasco Lourenço, vesinos et moradores en la dicha Villafranca, et outros.
Et yo Fernan Rodrigues, notario sobredicho, a todo esto que dicho es fuy presente con los dichos testigos, et al dicho rogo de los dichos Gonçalvo Rodrigues et Gonçalvo Peres et Gomes Ares, et a pedimento del dicho Rodrigo Alfonso, canonigo sobredicho, esta escriptura escrivi. Et vay escrito entre reglones una parte que diz herdades et non le empeezca. Et puse aqui mio nome et mio signo tal en testimonio de verdat.

Fernan Rodrigues, notario.