Sepan quantos esta carta vieren como yo Aras Perez y yo Martin Yanes, çidadanos de la villa de Lugo, conosçemos e otorgamos que nuestro señor el rey don Fernando julgo por sentençia que la villa de Lugo con la fialtade e con los muros e con las llaves de las puertas de la villa e con la seña e con todo el señorio e con todos los derechos e pertenençias fuese d'aqui en adelantre libre e quita de vos el onrrado señor don frey Johan, obispo desta misma çibdad, e los cidadanos moradores de la dicha villa fuesen vuestros vasallos segund se contien en la dicha sentencia que el rey dio sobresta razon et que nos prendio a nos mismos e nos metio en vuestro poder que fisiessedes de nos aquello que quisiessedes assi como de vuestros vasallos. Et agora facemos omenaje a vos el onrrado señor obispo, e juramos e prometemos a Dios e a Santa Maria las manos puestas sobre santos evangelios de guardar d'aqui adelantre bien e complidamientre el vuestro señorio en todas aquellas cosas que podiermos e sopiermos assi como leales vassallos a senor, e de non venir contra vuestro señorio en ninguna manera d'aqui adelantre. Otrossi fasemos omenaje en mano de Ferrant Paes, cavallero de iba de Ser, que tanto que vos obispo señor seades en Gallisia e nos mandaredes llamar por vuestro ome o por vuestra carta siendo nos en Lugo o en su termino, que del dia que recebiermos vuestro mandado seamos con vosco meternos en vuestro poder e en vuestras manos fasta ocho dias e fagades de nos lo que fuer vuestra merced et non lo fasiendo asi que vos pechemos dies mill maravedis desta moneda nueva que ora corre cada uno de nos. Et a esto obligamos a vos el dicho señor obispo los nuestros cuerpos mismos e todos nuestros bienes asi muebles como rayses para lo guardar e complir segund se en esta carta contien e so la dicha pena. Et por que esto sea firme e non venga en dubda rogamos a Johan Perez, escrivan del rey e notario publico de la reyna doña Constanza en Salamanca, que mande desto façer dos cartas en un tenor e ponga en cada una dellas su signo.

Yo Johan Miguelez la fiz por su mandado, veynte e tres dias de junyo, era de mill e CCC y cinquenta años.

Testigos: Johan Perez, notario; don Arias Perez Pardo, dean de Santiago e de Lugo; don frey Pedro, conpanero del dicho obispo; Ferrant Arias, canonigo de Lugo; Johan de Campo e Vasco Gomez, canonigos de Santiago; Afonso Rodrigues, canonigo de Salamanca; Ferrant Paez, cavallero de Ribas de Ser; Ruy Sordo e Ruy Mendez; Lope Alfonso e Gomez Fernandez, escuderos.

Yo Johan Miguelez et yo Johan Perez, notario sobredicho, fuy a esto presente e fiz escrivir esta carta e puge en ella mio signo a tal.