Don Lope de Mendoça, por la graçia de Dios et de la Santa Egllesia de Roma, arçobispo de Santiago, capellan mayor de nuestro señor el rey e su notario mayor del regno de Leon, e oydor de la su Audiençia, por faser bien e merçed a vos Leonor de Mendoça, nuestra sobrina, fija de Juan de Mendoça, nuestro sobrino, pertigueiro mayor de terra de Santiago, e esposa de Lope Sanches de Vlloa, damosvos que tengades e ayades de nos e de la nuestra Egllesia de Santiago en quanto fuerdes fiel e obediente vasalla a nos e a la dicha nuestra Egllesia e a nuestros suçesores, e en quanto nuestra merçed e voluntad fuere, el nuestro castillo de Benquerençia e las felegresias de Deça, que son estas que aqui dira, conviene a saber: las felegresias de Santa Maria de Toomonde et de San Cibrian de Chapa e de Santa Maria de Grava e de San Martiño de Prado e de Sant Martin de Fiestras et de Sant Martin de Palaçios et de Santa Maria de Abades et de San Salvador d’Escadro e de San Mamed de Seydos e de San Salvador de Çervaña et de Santiso e de San Mamede de Moalde et de Sant Martin de Vilar e de Santa Maria de Geestoso e de San Payo de Refoios et de San Miguel de Ponte e de Santiago de Tavoada, que son de la dicha nuestra Egllesia. El qual dicho castillo e feligresias susodichas tenia de nos, e de la dicha nuestra Egllesia, el dicho Juan de Mendoça, vuestro padre, el qual renunçio en nuestras manos las dichas feligresias e castillo, e nos podio, por merçed, que vos fesiesemos merçed dello. Et por esta nuestra carta, mandamos, so pena de la nuestra merçed et de dies mill maravedis para la nuestra Camara, a los moradores e pobladores en las dichas feligresias, e en cada vna dellas, que, de aqui endelante, en quanto fuerdes fiel et obediente vasalla a nos e a la dicha nuestra Egllesia e a nuestros suçessores, e en quanto nuestra merçed e voluntad fuere, recudan bien e cunplidamente en cada un año a vos o a vuestro çierto recabdo, con todas las rentas e derechos e señorios e terrarias e otras cosas qualesquier que deven e son tenudos de derecho de dar e pagar e non a otro alguno, e segunt que recudieron al dicho Juan de Mendoça, vuestro padre, e a Ferrant Perez Churrichão e a las otras personas que antes dellos tovieron de nos, e de la dicha nuestra Egllesia, las sobredichas feligresias. En testimonio de lo qual vos dimos, ende, esta nuestra carta de titulo firmada de nuestro nonbre e seellada con nuestro sello pontifical enpendiente. Dada en la nuestra çibdad de Santiago, dies e ocho dias de março, armo Domini Mº CCCCº vicesimo. Lupus, archiepiscopus Compostellanus. (Firma).
Yo Ruy Martines, escrivano de mi señor del arçobispo, la fise escribir por su mandado. (Signum).