Sepam quantos esta carta vieren commo yo, don Pedro, por la gracia de Dios rey de Castiella, de Leon, de Toledo, de Gallisia, de Sevilla, de Cordova, de Murçia, de Iahen, del Algarbe, de Algesira, et sennor de Viscaya, porque me dexieron que vos, Iohan Yanes de Burela, que queriades faser limosna al monesterio de las Duennas de Santa Maria la Nueva de Lugo, que es de la orden de Santo Domingo, et qu’el queriades dar et dotar un coto que disen de Pinera, que es en termino de Meyra, et vos logo dese liçençia para ello; et yo, por esto et por faser limosna al dicho monesterio, dovos liçençia que podades dar et dotar el dicho coto, si quiserdes, al dicho monesterio, si es vuestro et lo podedes dar non fasiendo perjuysio a otro alguno si algun derecho ha en el despues de vuestros dias, et todavia ficando a salvo la justiçia et jurediçion que yo he en el dicho coto, segund que la oy dia he. Et por esta mi carta o por el traslado della, signado de escrivano publico, mando a todos los adelantados et merynos et alcalles, et otros justiçias qualesquer del regno de Gallisia et de todas las otras çibdades et villas et logares de mios regnos, o a qualesquer dellos que esta mi carta vieren o el traslado della, signado commo dicho es, que si el dicho coto es vuestro et lo vos podedes dar que lo dedes et dotedes al dicho monesterio, si quiserdes, non fasiendo perjuysio a otro algunno si algun derecho ha enel despues de vuestros dias, que ponga en tenençia et en posesion del al que lo ovier d’aver et de recaudar por el convento et duennas que estovieren enel dicho monesterio, et les consientan levar las tierras del dicho coto et las anparen con la dicha tenençia et posesion, et non consientan que algunno nin algunos gela enbarguen todavia fincando a salvo la justiçia et jurediçion que yo en el dicho coto, segund que oy dia la he. Et los unos nin los otros non fagan ende al so penna de la mi merçed et de seysçientos maravedis a cada uno. Et desto mande dar esta mi carta sellada con mio sello de plomo colgado.

Dada en [Cartagena] dies dias de jullio, era de mill et quatroçientos et tres annos.

Yo el rey.