Notum sit omnibus presentibus et futuris, quod nos Heymericus abbas et conuentus Sancte Marie de Meyra damus hereditates nostras, quas habemus et habere debemus et hodie pacifice possidemus, videlicet, Formariz, Gasala, Lacuna de Susana, excepta hereditate ecclesie per suos terminos, et Lacuna de Iusana, Vimineyras, Pipin cum omnibus iuribus et pertinenciis suis per circuitum, hominibus qui uenerint ad commorandum in predictis hereditatibus et omni progenie sue usque in perpetuum iure hereditario possidendas, tali pacto: Quod unusquisque hominum ibidem commorantium singulas plazas habentium siue tenentium, det singulos morabetinos monasterio annuatim, medietatem, uidelicet, in festo Sancti Martini et alteram medietatem in Pasca, et singulas medias thalegas de ceuada et singulas gallinas et singuli tres dinarios, pro collecta abbatis, in festo Sancti Martini. Et si aliquis populator aliquem sceum receperit in sua plaça ad commorandum, per hoc forum sit liber et quitus. Preterea, debent omnes, qui in predictis hereditatibus commorati fuerint, esse vassalli boni et fideles abbatis et monasterii supradicti, et monasterium debet eos pro posse defendere ad directum. Debent etiam esse pascua et ligna communia hominibus ibidem commorantibus in istis villaribus supradictis. Et si aliquis uoluerit uendere suam plazam, tali uendat qui possit facere istud forum supradictum et si uassallus monasterii fidelis et hoc fiat de beneplacito populatoris ipsius ville uel cellararii monasterii. Et siquis suam plazam relinquerit quocumque modo, et per unum annum non pacaverit istud forum supradictum, perdat ipsam plazam et casam et populet eam monasterium in pace. Et sciendum, quod concilium debet eligere septem bonos homines de concilio, quos debet presentare abbati uel cui iusserit ipse, de quibus faciat abbas duos alcaldes et unum iudicem et IIII iuratos; qui alcaldes et iudex debent esse quiti a foro communi. Et si concilium non fuerit concordatum in istis bonis hominibus, abbas cum consilio bonorum hominum concilii debet eligere quos uoluerit; qui alcaldes debent tirare forum annuatim bene et fideliter et alias directuras et dare pacifice abbati monasterii uel cui iusserit; qui alcaldes et iurati debent constitui annuatim in festo Pasce. Preterea, nullus populator incautet predictas hereditates aliquo modo, vel alienet eas monasterio, vel faciat vandum contra monasterium uel contra concilium seu vicinum cum aliquo extraneo, qui non sit de concilio; quod si fecerit perdat hereditatem et exeat de villa, si non emendauerit ad mandatum abbatis et alcaldum qui pro tempus fuerint. Preterea sciendum, quod complendo concilium totum istud quod dicitur in hac carta, debent esse liberi et quiti de alio toto foro, videlicet, de nucio, de maninadigo et de luctuosa et mouicio et de tota alia fazendeyra et uocibus terre, exceptis uocibus Regis, de quibus facta prius compositione cum homine Regis habeat concilium tertiam partem et monasterium duas partes. Et si aliquis fecerit homicidium pro defensione ipsius populancie uel ipsius concilii, non pectet eum; et si eum aliter fecerit, adueniat se de eo cum abbate monasterii supradicti. Item sciendum est, quod si ferrum inuentum fuerit in aliqua plaza que seminata non fuerit alicuius, siue in monte uel in alio loco, possit ipsum ferrum tirare monasterium et habere in pace sine contradictione alicuius. Quod si alquod damnum fecerit, debet monasterium corrigere ad mandatum duorum concilii hominum et clerici ecclesie. Et notandum, quod in Formariz debent esse duodecim plaze, et sex in Gasala, et septem in Lacunis, et sex in Vimineyras et tres in Pipin, quibus villaribus per aquas antiquitus sunt diuisi. Item notum, quod si nos populauerimus Marfuli vel Gande seu illos villares super quibus contendimus cum hominibus de Villarente, debent se ambe populancie mandare duos alcaldes et unum iudicem. Et istam cartam fori debent alcaldes fideliter custodire, et abbati monasterii et populatori et concilio quando necesse fuerit demostrare. Facta carta era M CCC et quot XIII Kalendas Aprilis, per manus Petri Roderici, monachi, qui hanc cartam scripsit de utriusque partis licentia et mandato.