CHRISTUS. In nomine Domini nostri Ihesu Christi, amen. Facta que pagine non traduntur facile a memoria elabuntur, ea propter ego domnus Fernandus, Dei gratia Hyspaniarum rex, vna cum vxore mea domina regina domna Vrraca et cum filio meo rege domno Alfonso, do vobis Johanni Froyle dicto Marino illum regalengum dictum Perariam de Nemancos vt ab hac die et deinceps ipsum regalengum habeatis cum pratis, pascuis, montibus, fontibus, exitibus et ingressibus et cum omnibus directuris et pertinenciis suis ubi eas inuenire potueritis; et possideatis, vendatis, donetis, commutetis et totam uestram uoluntatem de illo faciatis et jure hereditario imperpetuum illud uobis et successoribus uestris habendum dono et concedo pro bono seruicio quod mihi fecistis. Et similiter do uobis ecclesiam prefati regalengi de Nemancos dictam Sanctum Julianum de Peraria cum toto ipso regalengo.

Siquis igitur de meo genere quam de alieno hoc meum uoluntarium factum infringere temptauerit iram omnipotentis De<i> et regis indignationem incurrat et cum Juda Domini traditore in inferno sit dampnatus et pro temerario ausu parti regie tres mille mor<a>bitinos persoluat et quod inuaserit uobis uel uoci uestre in quadruplum reddat; et hoc scriptum semper maneat firmum.

Facta carta apud Ciuitatem Roderici, mense marcii, era Mª CC XIª; reinante illustrissimo rege domno Fernando Legione, Extremadura, Gallecia et Asturiis.

Ego domnus Fernandus, Hyspaniarum rex, hoc scriptum quod fieri jussi proprio robore conf.

Comes vrgellensis, domini regis maiordomus, domina<n>s in Toronio et Limia, conf. Comes Gomez in Trastamar, conf. Fernandus Ruderici tene<n>s turres Legionis, conf. Comes Gomez Castellanus, conf. Guter Guterri, signifer regis, conf.  Johannes Arie, conf.

Petrus, Dei gratia salamantinus episcopus et compostellane ecclesie uenerabilis electus, conf. Johannes, Legionis episcopus, conf. Adam, auriensis episcopus, conf. Johannes, lucensis episcopus, conf. Rabinadus, minduniensis episcopus, conf. Petrus, cauriensis episcopus, conf.

Ego Petrus Iohannis, domini regi notarius, scripsi et confirmo.