Sepan quantos esta carta vieren como yo ynfante don Felipe, fijo del muy noble rey don Sancho, señor de Cabrera, et de Rivera, e pertiguero mayor en tierra de Santiago, e comendero de la yglesia de Lugo, a vos don frey Juan, por la gracia de Dios obispo de Lugo, mio amigo, que tengades de mi por en todos vuestros dias todo lo que yo he en las feligresias de Santa Maria de Castello de Asma, e de San Juliano del Campo, heredamiento, señorio, caritel, vozes, enlizas, con todos los otros derechos que yo y he, e debo haber por qual manera quier. Et mando a todos los homes que moran en estos logares sobredichos que vos recudan bien e cumpridamente, con todos estos derechos sobredichos a vos ou a quien los vos enbiaredes mandar por vuestra carta; e non a otro ninguno, e fagan por vos asi como farian por min mismo. E defendo que ninguno non sea osado de embargar, nin contrariar a vos don frey Joan obispo sobredicho nenguna destas cosas que dichas son, ca qualquier que lo feciese pecharme ha en pena mil maravedis de la moneda nueva, e demas al corpo e a quanto que hoviese me tornaria por ello. Et desto vos mande dar esta mi carta seellada con mio seello colgado.

Dada en Lugo, vinte dias de abril, era de mil et trescientos et quarenta e ocho años.

Yo Alfonso Yañez la fis escrevir por mandado del ynfante.