Ob honorem sancte et individue Trinitatis Patris videlicet et Filii ac Spiritus Sancti. Ego Munio Goncalviz et uxor mea Lupa Nuniz, grato animo sanoque consilio et propria voluntate facimus testamentum de propria nostra hereditate quam habemus inter castellum sancti Iohannis de Olariis et inter alium castellum Aquilar, et vocitatur ipsa villa Garavelos. Testamus eam ad monasterium Cellenove pro remedio anime nostre ut inde servi Dei habeant temporale subsidium, et nos in futuro seculo eternum premium. In presentia domni Pelagii abbatis illud monasterium regentis, damus eam et cunctorum seniorum fratrum inibi sub regula sancti Benedicti commorantium testamus adque concedimus ad supradictum monasterium Cellenove villam nostram Gravelos ab integro cum suo cauto per suos terminos novissimos et antiquos. Sicut eam domnus meus imperator Adefonsus tradidit mihi, etiam testo ad monasterium cum quanto in se obtinet et ad prestitum / hominis est, et interim dum uxor mea Lupa vixerit tam vos quam successores vestri adiuvetis eam de alia vestra villa. Ista villa habet iacentiam subtus monte Larauco discurrente rivulo Salar. Alteram vero scripturam antepositam aut postpositam stabilire minime permittimus, sed istam solam Deo in \e\ternum servire non damus. Quisquis vero hoc testamentum infringere temptaverit, filius vel filia, propinquus vel extraneis, in primis sit excommunicatus et a lumine eclesie segregatus, et quantum infringere temptaverit restituat et in duplo et in iudicato mille solvat solidos, et si ad mortem perseveraverit cum Iuda traditore sempiternas luat penas. Et hoc factum nostrum non sit violatum sed roborem habeat perpetuum.

Facta carta testamenti die IIIIª nonas Marcii. Era M C LXXXIIII.

Ego Munio Goncalviz et uxor mea Lupa Nuniz hoc testamentum quod fieri postulavimus coram idoneis testibus propriis manibus roboravimus.

Menendus Fagan cfr. Arias Calvus cfr. Pelagius Gallecus cfr. Domno Adefonso in Legione imperante, Arias Petrides Limiam, domno Martino episcopo Ovetensi presidente.

Pro testibus: Petrus ts. Pelagius ts. Munio ts.

Pelagius qui notuit.